Þórarinn Ingi aftur í ÍBV

Þórarinn Ingi Valdimarsson snýr heim úr atvinnumennsku á næstunni og mun því spila með ÍBV seinni hluta Pepsi deildarinnar. Þetta staðfesti hann í samtali við 433.is.

Þórarinn Ingi hefur verið á láni hjá norska liðinu Sarpsborg 08 í eitt og hálft ár.

Lánssamningur hans er til 21 júlí og því getur hann spilað með ÍBV eftir það.

,,Ég vildi sjálfur í raun koma heim og hjálpa ÍBV,“ sagði Þórarinn við 433.is.

,,Ég hef bara jákvæða hluti að segja um Noreg og hef notið þess að vera hérna.“

,,Eyjamenn eru í vanda staddir og félagið hefur gert allt fyrir mig í gegnum tíðina, vonandi get ég komið heim og hjálpað liðinu.“

,,Sarpsborg hefur gert vel við mig oeg ég á liðinu mikið að þakka, ég tel að ég hafi bætt mig sem leikmaður hérna.“

Norska liðið reyndi að kaupa Þórarinn nú í sumar en ekki tókst að ná samkomulagi við ÍBV og það skilur Þórarinn vel.

Þórarinn er 24 ára gamall en hann getur spilað sem bakvörður, kantmaður og miðjumaður.

Ljóst er að þetta er öflugur liðsstyrkur fyrir Eyjamenn sem unnu sinn fyrsta sigur í Pepsi deildinni í sumar gegn Keflavík á miðvikudaginn.


desktop